DIY - طبخ وصناعه الليكود

فكرة الداى ( DIY ) او صناعه ليكود الفيب بنفسك :

واحدة من أكبر المشاكل اللى بتقابل أي فيبور جديد ، هي تكلفة الليكويد .. لو كنت بتشتري ليكويد ، يا إما الأسعار مرتفعه ، أو الأسوأ إنك تشترى منتج ، يطلع طعمه مش هقول وحش ، هقول لا يتناسب من ذوق حضرتك .

أو ممكن نسبة النيكوتين ( اللى في غالبية الدعاية بيكون مظبوط على الشعره و نيكوتين شرعى ) مش مناسبه حضرتك ، يا إما عاليه و عامله حرقان في زورك ، أو قليله و مش ظابط دماغك .

انا نفسى كنت في الدايره المفرغه دى لفتره طويله ، لغاية ما عرفت الحل :

حل الموضوع ده إنك تعمل الليكويد بنفسك ، و الموضوع في البدايه بيكون طلاسم و بتكون مش عارف تبتدى إزاى ولا تعمل إيه

بس مع التجربه ، هتكتشف إنها فعلا سهلة و كمان موفرة جدا + إنك حقيقي هتبقى فى قمة سعادتك لما تشرب حاجة انت اللى طابخها ضامن مكوناتها ، و تكون ظبطت نسب كل حاجه من فليفورز لنيكوتين بالشكل اللى يناسبك إنت شخصياً ، مش اللى مفروض عليك منالجاهز اللى بتشتريه .

إيه أصلاً هو الداى ( DIY) :

الداى ( DIY) تعريفه ببساطه هي عملية خلط لأربعة عناصر رئيسية ينتج عن مزجهم المنتج النهائي و هو الليكويد ، العناصر دى :

• جلسرين نباتى ( VG)

• بروبلين جليكول (PG )

• نيكوتين ( NIC )

• فليفور أو النكهات ( سواء سينجل ، أو مجموعة فليفورز مع بعض بنسب معينه لعمل ريسيبى متكامله )

و لازم حضرتك بالنسبة للبروبلين و الجلسرين تتأكد انها ( USP ) ، بمعنى انها معدة طبقا لشروط منظمة العقاقير الامريكية ، مش أي مواد تستخدمها ، لأن في النهاية دى صحتك ، و حضرتك ماسبتش التدخين العادى بكل أضراره ، علشان تستخدم مواد غير صالحه للتبخير و تضر نفسك برضه .

بجانب المكونات الأساسية اللى ذكرناهم ، هتحتاج بعض الادوات اللازمة للخلط فيها و التعتيق :

• أزايز للخلط و التعتيق - ودي لازم تكون من نوع (PET ) ، ولو فيه إمكانيه تكون من الزجاج هيكون احسن بكتير .

• سرنجات للمعايره : هتحتاج شوية سرنجات ، ممكن تجيبهم من أي صيدليه أو أماكن بيع المستلزمات الطبية أو العطور حتى :

• سرنجات مقاس 50 مل : هتجيب منها إثنين ، واحده للجلسرين و التايه للبروبلين

• سرنجات مقاس 10 مل : هتجيب منها حوالي 5 مثلاً ( تقريباً حسب كم الفليفورات المستخدمه )

• سرنجات مقاس 3 أو 5 مل : هتجيب منها واحد للنيكوتين .

• قطارات للتعبئة : علشان بعد إنتهاء فترة التعتيق ، تعبى فيهم و تستخدم منهم على قد إحتياجك ، بدون تعريض الكمية الكليه لليكويد للهواء اللى هيأثر سلباً عليه و ممكن يأكسد .

• ورقة لصق : توضع على كل زجاجة تعتيق لتعريف تاريخ عمل الليكويد و تاريخ ميعاد إنتهاء التعتيق .

إيه بقى اللى هتحتاجه عشان تعمل الليكويد ؟

الخطوة الأولي : هتحتاج لوصفة ونسب :

مثلا حضرتك قررت تعمل وصفة توباكو فانيليا كراميل ، حضرتك هتجيب الوصفة بتاعتها و ليكن إخترت وصفة كالتالي :-

• RY4 Double ( TFA ) 10%

• Caramel Candy ( TFA ) 5%

• Vanilla Swirl ( TFA ) 5%

حضرتك هتلاقي دائماً السطر في الوصفة عبارة عن 3 حاجات جنب بعض :

• أول جزئية : إسم الفليفور ( توباكو ، كراميل ، فنايليا ، ....إلخ .

• جنبها الشركة المصنعة للفليفور ، لأن كل شركه بتنتج الفيفور له كيان مميز و نسب الإستخدام بتختلف من شركه لشركة

مثلاً (TFA) ، إختصار لإسم الشركة المصنعة للفليفور : The Flavor Apprentice

• و أخيراً النسبة المئوية المطلوبة من الفليفور ، يعنى مثلاً ( 10 % ) يبقى حضرتك هتحتاج 10 مل عشان تعمل ليكويد 100 مل

الخطوة التانية : حضرتك مدخن إيه ؟ :

محتاج تحدد حضرتك مدخن شيشه ولا سجاير ، علشان تقدر تحدد إنت هتعمل الليكويد بنسبة كام VG لكام PG

• 70 % جلسرين و 30 % بروبلين وفليفر ونيكوتين ( دى النسب المتعارف عليها لليكويد المستخدم لتانكات نفس الشيشه ) .

• 50 % جلسرين و 50 % بروبلين وفليفر ونيكوتين ( دى النسب المتعارف عليها لليكويد المستخدم لتانكات نفس السجاير ) .

• 60 % جلسرين و 40 % بروبلين وفليفر ونيكوتين ( دي واحده من اشهر نسب لتانكات نفس السجاير )

• نسب خلط MAX VG ودي بتكون عن اضافه الفليفر والنيكوتين وباقي الكميه جلسرين ( ودي مخصصه للناس اللي عندها تحسس من البروبلين )

الخطوة التالتة : النيكوتين الحقيقى ( على الشعره و شرعى فعلياً بقى )

كل مستخدم فينا مختلف فى إحتياجه .. يبقى حضرتك اللى هتقرر هتحط كام نسبة نيكوتين اللى تناسبك ..

لكن لو محتاج النصيحة .. إبدأ بنسبه أقل من اللى بتشربه في الجاهز ، يعنى لو بتشترى جاهز ليكن ( 6 نيكوتين ) مثلاً ، يبقى تعمل النيكوتين بتاعك تركيز 4.5 فى الاول .. و جرب .

الخطوة الرابعة : حساب الكميات :

محتاج تحدد النسب المظبوطة للكميات ، و لو حاسس انك هتتلغبط و مش عارف هتحط كام جلسرين و كام بروبلين والنيكوتين

ببساطه حضرتك هتشوف :

• أولاً هعمل الريسيبى لتانك سجاير ولا تانك شيشه ، و على أساسها أحط كمية الجلسرين ( 50 مل ولا 70 مل )

• أحط الفليفورز بنسبهم زى ما مكتوبين في الريسيبى ( و طبعاً بنعمل تنسيب للكميه لو هتعمل كميه مختلفه عن 100 مل ) .

• أحط النيكوتين بتاعى طبقاً لمزاجى

• إجمع كمية كل ما سبق تطرحهم من ال100 يطلع لحضرتك كمية البروبلين اللى هتحطه على الخلطة .

( و حابب أقول بس إن فيه فى ملفات الجروب شيت إكسيل لحساب الكميات أوتوماتيك للتسهيل على الأعضاء الأفاضل ) .

الخطوة الرابعة : الخلط :

• أولاً مهم جداً تشتغل في مكان نضيف و مناسب و صحي ، طهر إيديك ، يفضل لبس جوانتى مطاط ( خصوصاً و حضرتك هتستخدم نيكوتين و ده ماده سامه ) .

إعتبر نفسك هتطبخ بجد ، ينفع تطبخ في مكان مش نضيف او إيديك مش ضامن مدى نضافتها ؟ إحنا أصلاً إتجهنا للداى ( DIY ) علشان نضمن المكونات ، متجيش تلوثها بنفسك بقى .

حضرتك هتجيب الإزازه بتاعتك ، و تطلع شوية السرنجات الجميله اللى قنا عليهم في أول البوست ( فاكرهم ؟؟ ) و نبتدى :

1- السرنجة ال 50 مل ، هتعاير بيها الجلسرين ، هتاخد ال50 مل بتوعك و تحطهم فى الإزازه .

2- نجيب بقى السرنجة ال 3 أو ال 5 مل ، وتستخدمها في وضع النيكوتين 3حسب ما حضرتك إستقريت على نسبته ، و تحطهم فوق الجلسرين اللى فى الإزازة .

3- تجيب سرنجة 10 مل للفليفور الأول ( التوباكو) ، وتعاير بيها 10 مل ، و تحطهم على الخليط فى الإزازه ، و لا يتم إستخدام نفس السرنجه مره أخرى نهائي ، على الأقل لحد ما تبقى تغسلها و تطهرها كويس و تسيبها تنشف .

4- تجيب سرنجة تانية 10 مل للفليفور الثانى ( كراميل) ، وتعاير بيها 5 مل ، و تحطهم على الخليط اللى فى الإزازه ، و تركن السرنجة زى أختها اللى فوقها و ماتستخدمهاش تانى .

5- تجيب سرنجة ثالثه 10 مل للفليفور الثالث ( فانيليا) ، وتعاير بيها 5 مل ، و تحطهم على الخليط اللى فى الإزازه .

6- هيتبقى عندك تحط البروبلين ، إحسب بقى :

• أنا بعمل 100 مل مثلاً .

• حطيت 50 جلسرين + 6 نيكوين + 10 توباكو + 5 كراميل + 5 فانيليا : مجموعهم = 76 مل .

• يبقى فاضل 24 مل علشان المجموع يوصل 100 ، صح ؟

• خدهم بسرنجة من ازازة البروبلين و حطهم على الخليط. و بكدة معاك 100 مل بالتمام و الكمال .

و هنا نيجى لمرحلة الخلط التمام و مزج المكونات :

لازم تمزج الخليط ده كويس جدا علشان المكونات تختلط و تمتزج للحصول على منتج نهائي سليم .

فيه ناس تستخدم مضرب الكابتشينو لمزج الليكويد ده ..أنا عن نفسى مش بفضل الموضوع ده لدخول هواء كتير في الليكويد ممكن يأثر عليه سلباً ، بس هي آراء و ليس قرآن منزل .

أو ممكن تقفل الازازة بغطاها و تفضل ترج فيها لحد ما تعكر ولونها يبقى ابيض او مائل للإصفرار شوية.

الخطوة الخامسة: التعتيق:

تمام كده ؟ خلطنا المكونات و رجينا الإزازه لحد ما دراعنا باظ و خدل ؟ بس المهم الحاجه إتخلطت صح و اللون بقى زى ما وصفنا .

بس خلاص .. اقفل إزازتك .. حطها فى مكان ضلمة وفي درجة حرارة الغرفة واقفل عليها فترة كدة من 3 اسابيع لشهر ، علشان تمتزج النكهات فيه كويس مع بعضها.

اكتب بقى يا فندم التاريخ على الورقة الإستيكر و ألصقها على الإزازه .. عشان تعرف عملته امتى و إمتى تاريخ فتح الازازة و التجربه.

ملحوظه هامه : راعى جداً و خلى بالك ان الحرارة وأشعة الشمس المباشرة ممكن تبوظ الليكويد وتخليه ما ينفعش تشربه ، فبرجاء مراعة أن فى مرحلة التعتيق، حط الإزازه فى مكان ضلمة انت متأكد ان حرارته كويسة ، مش مكان الحرارة فيه مرتفعة.

بعد إنتهاء فترة التعتيق ، طلع الازازة .. إشرب يا فندم و قول لنفسك : ( عمايل إيديا وحياة عينيا )

وهابي فيب المحتوى ده من كتابه أ/ رامي نصار - بجروب اتحاد الفيب المصري Egypt Vape Union